អបអរសាទរទិវាអន្តរជាតិប្រយុទ្ធប្រឆាំងគ្រឿងញៀន ២៦ មិថុនា ២០២២ និងពិធីដុតបំផ្លាញវត្ថុតាងគ្រឿងញៀន ក្រោមប្រធានបទ “ដោះស្រាយបញ្ហាគ្រឿងញៀនក្នុងវិបត្តិសុខភាព និងមនុស្សធម៌ “
ខេត្តបន្តាយមានជ័យ៖នៅសាកលវិទ្យាល័យជាតិមានជ័យ នាព្រឹកថ្ងៃទី២៩ ខែកក្កដា ឆ្នាំ២០២២ មានរៀបចំពិធី អបអរសាទរទិវាអន្តរជាតិប្រយុទ្ធប្រឆាំងគ្រឿងញៀន ២៦ មិថុនា ២០២២ និងពិធីដុតបំផ្លាញវត្ថុតាងគ្រឿងញៀន ក្រោមប្រធានបទ “ដោះស្រាយបញ្ហាគ្រឿងញៀនក្នុងវិបត្តិសុខភាព និងមនុស្សធម៌ “ ក្រោមអធិបតីភាពឯកឧត្តម ឧត្តមសនីយ៍ កែ គឹមយ៉ាន ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន។
នាឱកាសនោះដែរឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានអានសារលិខិតរបស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដោយមានខ្លឹមសារថា យើងខិតខំប្រឹងប្រែងទទួលបានផលល្អយ៉ាងនេះក្ដី ប៉ុន្តែនិន្នាការរួមជាសកលកម្ពុជាយើងក៏ដូចជាបណ្ដាប្រទេសដទៃទៀតនៅតែប្រឈមគួរឲ្យព្រួយបារម្ភ ពីការប៉ុនប៉ងផលិតកែច្នៃរក្សាទុកជួញដូរ និងប្រើប្រាស់គ្រឿងញៀន ទាំងក្នុងពេលបច្ចុប្បន្ន និងទៅអនាគត យោងលើស្ថានភាពនេះនិងក្នុងគោលដៅ រក្សាបាននូវនិរន្តរភាពនៃប្រសិទ្ធភាពការងារជាបន្ទាន់ចំនួនពិសេសក្នុងបរិបទពិភពលោកទាំងមូលបាននិងកំពុងប្រឈមនឹងវិបត្តិនានា ពិសេសផ្នែកសុខភាព និងមនុស្សធម៌ ហើយក៏សូមអំពាវនាវដល់បងប្អូន កូនក្មួយ ព្រមទាំងចៅៗ ដែលជាជនរួមជាតិទាំងអស់ ពិសេសមាតាបិតា និងអាណាព្យាបាលសុំបន្តចូលរួម គាំទ្រឲ្យបានកាន់តែសកម្មថែមទៀត ដើម្បីរួមគ្នាបង្ការទប់ស្កាត់ និងដោះស្រាយនូវរាល់បញ្ហាដែលអាចកើតមានឡើងនៅក្នុងសហគមន៍។
ជាមួយគ្នានោះដែរ ឯកឧត្ដម ឧបនាយករដ្ឋមន្ត្រី កែ គឹមយ៉ាន បានមានប្រសាសន៍ថា ជាការពិតណាស់ការងារប្រយុទ្ធប្រឆាំងគ្រឿងញៀន គឺជាកាតព្វកិច្ចរបស់រាជរដ្ឋាភិបាល និងអាជ្ញាធរមូលដ្ឋានគ្រប់លំដាប់ថ្នាក់ ក៏ប៉ុន្តែប្រសិនបើគ្មានការចូលរួមពីប្រជាពលរដ្ឋ វិស័យឯកជន និងសហគមន៍ដែលនោះ ការងារនេះនឹងមិនទទួលបានភាពជោគជ័យនោះឡើយ មានន័យថា ទន្ទឹមនឹងវិធានការអនុវត្តច្បាប់ និងការគាំពារផ្នែកសុខុមាលភាពសង្គម កាន់តែប្រសើរចាំបាច់ត្រូវជំរុញការចូលរួមពីគ្រប់សមត្ថភាពដែលរួមមានចាប់ពីបុគ្គលម្នាក់ ក្រុមគ្រួសារ អាណាព្យាបាលសមាជិកសហគមន៍អង្គការសង្គមស៊ីវិលវិស័យ ឯកជន និងផ្នែកសាសនាផងដែរ ។
ទន្ទឹមនោះឯកឧត្ដម បានមានប្រសាសន៍សង្កត់ធ្ងន់ថា គ្រឿងញៀនទាំងអស់ ត្រូវដុតបំផ្លាញ ហើយចំពោះជនណាដែលពាក់ព័ន្ធគ្រឿងញៀន សូមបញ្ឈប់ជាបន្ទាន់ បើនៅតែប្រព្រឹត្ត មិនអាចរួចពីសំណាញ់ច្បាប់បាននោះឡើយ ។
នាឱកាសនោះដែរ យុវជនអប់រំស្ដារនីតិសម្បទានៅមជ្ឈមណ្ឌលជីវិតថ្មី លំបាកនៃខេត្តបន្ទាយមានជ័យ បានប្ដេជ្ញាចិត្តបញ្ឈប់នូវការប្រើប្រាស់គ្រឿងញៀនគ្រប់ប្រភេទ ធ្វើជាកូនល្អក្នុងគ្រួសារ ឈប់សេពគប់មិត្តភក្តិមិនល្អ និងត្រូវនិយាយថា ទេសម្រាប់គ្រឿងញៀន ផងដែរ ៕
