កិច្ចប្រជុំ ស្ដីពីការពង្រឹងកិច្ចការពារសន្តិសុខ សុវត្ថិភាព សណ្ដាប់ធ្នាប់ របៀបរៀបរយសាធារណៈ នៅក្នុងខេត្តត្រៀមរៀបចំផែនការ ការពារសន្តិសុខសណ្តាប់ធ្នាប់នាថ្ងៃបោះឆ្នោតខាងមុខ
(ប៉ៃលិន)៖គណៈបញ្ជាការឯកភាពខេត្តប៉ៃលិន កាលពីរសៀល ថ្ងៃទី២៩ ខែឧសភា ឆ្នាំ ២០២២ បានបើកកិច្ចប្រជុំ ស្ដីពីការពង្រឹងកិច្ចការពារសន្តិសុខ សុវត្ថិភាព សណ្ដាប់ធ្នាប់ របៀបរៀបរយសាធារណៈ នៅក្នុងខេត្ត និងត្រៀមរៀបចំផែនការ ការពារសន្តិសុខសណ្តាប់ធ្នាប់ សម្រាប់ការបិទយុទ្ធនាការឃោសនា និងដំណើរការ បោះឆ្នោតជ្រើសរើសក្រុមប្រឹក្សាឃុំ – សង្កាត់ អាណត្តិទី ៥ ឆ្នាំ២០២២ នៅថ្ងៃទី៥ ខែមិថុនា ឆ្នាំ២០២២ ខាងមុខ ក្រោមអធិបតីភាព លោកជំទាវ បាន ស្រីមុំ អភិបាលនៃគណៈ អភិបាលខេត្ត និងជាប្រធាន គណៈបញ្ជាការឯកភាពខេត្ត ។
លោកជំទាវ បាន ស្រីមុំ បានមានប្រសាសន៍ថា៖ ការងារសន្តិសុខ សុវត្ថិភាព និង សណ្តាប់ធ្នាប់ ក្នុងការបិទយុទ្ធនាការឃោសនានិងដំណើរការ បោះឆ្នោតជ្រើសរើសក្រុមប្រឹក្សាឃុំ–សង្កាត់ អាណត្តិ ទី ៥ ឆ្នាំ ២០២២ នេះ ដើម្បីឱ្យបានកាន់តែរលូន និងមានប្រសិទ្ធភាពខ្ពស់ គឺស្ថាប័នជំនាញពាក់ព័ន្ធ អាជ្ញាធរ មូលដ្ឋាន និងកងកម្លាំងទាំង ៣ប្រភេទ ត្រូវសហការគ្នាឱ្យបានល្អ ដោយត្រូវអនុវត្តតាមតួនាទី និងភារកិច្ច របស់ខ្លួន ព្រមទាំងគោរពឱ្យបានខ្ជាប់ខ្ជួននូវច្បាប់ បទបញ្ជា នីតិវិធី និង ក្រមសីលធម៌ ដោយស្របតាមច្បាប់ រដ្ឋធម្មនុញ្ញ និងច្បាប់របស់គណ:កម្មាធិការជាតិរៀបចំការបោះឆ្នោត ដើម្បីធានាបាននូវសន្តិសុខ សុវត្ថិភាព និងសណ្តាប់ធ្នាប់ ជូនគណបក្សនយោបាយ និងប្រជាពលរដ្ឋទាំងអស់ ទទួលយកបាននូវលទ្ធផល នៃការ បោះឆ្នោត តាមបែបលទ្ធិប្រជាធិបតេយ្យ សេរីពហុបក្ស ។
លោកជំទាវប្រធានគណៈបញ្ជាការឯកភាពខេត្តប៉ៃលិន បានកោតសរសើរ និងវាយតម្លៃខ្ពស់ លើកិច្ចសហប្រតិបត្តិការរវាងអាជ្ញាធរគ្រប់លំដាប់ថ្នាក់ មន្ទីរអង្គភាពជំនាញជុំវិញខេត្ត និង កងកម្លាំងប្រដាប់ អាវុធទាំង ៣ប្រភេទ ដែលបានបំពេញការងារតាមតួនាទីភារកិច្ច ទទួលបានលទ្ធផលល្អ ហើយក៏ជា មោទនភាពដែលយើងទាំងអស់គ្នា បានខិតខំអនុវត្តការងារតាមផែនការ ធ្វើឱ្យខេត្តប៉ៃលិន មានការ អភិវឌ្ឍន៍រីកចម្រើន ព្រមទាំងកសាងបាននូវសមិទ្ធផលថ្មីៗជាច្រើនជូនប្រជាពលរដ្ឋនៅមូលដ្ឋាន ដូច្នេះយើងត្រូវខិតខំបន្ថែមទៀត ក្នុងន័យបម្រើផលប្រយោជន៍ និងសេចក្តីត្រូវការរបស់ប្រជាពលរដ្ឋ ដោយត្រូវយកចិត្តទុកដាក់ខ្ពស់ទៅលើការដោះស្រាយបញ្ហាប្រឈមនានា ក៏ដូចជាបម្រើសេវាសាធារណៈ ជូនប្រជាពលរដ្ឋ ឱ្យបានឆាប់រហ័សទាន់សភាពការណ៍ និងមានប្រសិទ្ធភាពខ្ពស់ ។
នៅក្នុងឱកាសនោះផងដែរ លោកជំទាវ បាន ស្រីមុំ បានមានប្រសាសន៍ជំរុញដល់ អាជ្ញាធរមូលដ្ឋាន គ្រប់លំដាប់ថ្នាក់ និងស្ថាប័នជំនាញពាក់ព័ន្ធ ត្រូវបន្តយកចិត្តទុកដាក់ពង្រឹងលើកិច្ចការពារ ការឆ្លង រីករាលដាលនៃជំងឺកូវីដ–១៩ ឱ្យបានល្អបំផុត ដោយបំផុសឱ្យប្រជាពលរដ្ឋ បន្តអនុវត្តឱ្យបានខ្ជាប់ខ្ជួន នូវវិធានសុវត្ថិភាព «៣ការពារ ៣កុំ» និងបន្តផ្សព្វផ្សាយណែនាំដល់ប្រជាពលរដ្ឋ ទៅចាក់វ៉ាក់សាំង ការពារជំងឺកូវីដ–១៩ ទាំងដូសមូលដ្ឋាន និងដូសជំរុញឱ្យបានគ្រប់ៗគ្នា៕
