លោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែតដឹកនាំកម្លាំង ចុះឃាត់ខ្លួនជនសង្ស័យម្នាក់ ពាក់ព័ន្ធករណីលួចម៉ូតូ នៅក្នុងក្រុងប៉ោយប៉ែត!!!
ខេត្តបន្ទាយមានជ័យ៖នៅវេលាម៉ោង១៦និង៣៧នាទី នៅថ្ងៃទី០៧ ខែសីហា ឆ្នាំ២០២៣នេះ កម្លាំងមូលដ្ឋានកងរាជអាវុធហត្ថក្រុងប៉ោយប៉ែត ដឹកនាំដោយលោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែត ចុះឃាត់ជនសង្ស័យម្នាក់ កករណីលួចម៉ូតូ ប្រព្រឹត្តកាលពីវេលាម៉ោង១០និង០០នាទី ថ្ងៃទី០៣ ខែសីហា ឆ្នាំ២០២៣ នៅចំណុចផ្សារអគ្គ ស្ថិតក្នុងភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
ករណីនេះធ្វើឡើងតាមពាក្យបណ្តឹងឈ្មោះ វណ្ណា ធីដែត (ហៅស្រីពៅ) ភេទស្រី អាយុ៣០ឆ្នាំ ជនជាតិខ្មែរ មានទីលំនៅស្ថិតក្នុងភូមិបាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
លោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងបានឱ្យដឹងថា ជនសង្ស័យឈ្មោះ ស៊ិន យ៉ា ភេទប្រុស អាយុ២៩ឆ្នាំ ទីកន្លែងកំណើតភូមិក្បាលស្ពាន១ ឃុំប៉ោយប៉ែត ស្រុកអូរជ្រៅ ខេត្តបន្ទាយមានជ័យ បច្ចុប្បន្នរស់នៅមិនពិតប្រាកដស្ថិតនៅក្នុងក្រុងប៉ោយប៉ែត។
លោកវរសេនីយ៍ត្រី នួន នីណារ៉ូ បន្តថា កាលពីវេលាកេីតហេតុជនរងគ្រោះបានជិះម៉ូតូម៉ាកហុងដាឃ្លីក ពណ៌ស ផលិតឆ្នាំ២០១៩ គ្មានស្លាកលេខ ទៅហាងសាឡនរបស់ខ្លួនដូចរាល់ដង ដោយបានទុកម៉ូតូនៅមុខហាង ហើយដកសោរម៉ូតូទុកក្នុងប្រអប់ម៉ូតូខាងមុខជាប់នឹងម៉ូតូ រួចក៏ដេីរចូលទៅក្នុងហាងធ្វើសក់ឱ្យភ្ញៀវ មួយសន្ទុះខ្លួនចេញមកក្រៅ ក៏ស្រាប់តែបាត់ម៉ូតូ ហើយក៏បានស្រែកឆោឡោរ ប្តឹងសមត្ថកិច្ចកងរាជអាវុធហត្ថដើម្បីជួយស្រាវជ្រាវ។ បន្ទាប់ពីទទួលបានពាក្យបណ្តឹងកម្លាំងកងរាជអាវុធហត្ថក្រុង បានចុះប្រតិបត្តិការ និងធ្វើការស្រាវជ្រាវរហូតដល់វេលាម៉ោង ១០និង០០នាទីព្រឹក ថ្ងៃទី០៧ ខែសីហា ឆ្នាំ២០២៣ ទើបឃាត់ខ្លួនជនសង្ស័យបាន រួមទាំងដកហូតវត្ថុតាង នាំមកកាន់មូលដ្ឋានដើម្បីធ្វើការសួរនាំ និងចំណាត់ការតាមនីតិវិធី។
ក្រោយឃាត់ខ្លួន និងសួរចម្លេីយ ជនសង្ស័យបានសារភាពថា ខ្លួនពិតជាបានធ្វេីសកម្មភាពលួចម៉ូតូជនរងគ្រោះពិតប្រាកដមែន។ ដោយផ្អែកលេីចម្លេីយសារភាព និងវត្ថុតាងជាក់ស្តែងកម្លាំងមូលដ្ឋានកងរាជអាវុធហត្ថក្រុង បានកសាងសំណុំរឿងបញ្ជូនជនសង្ស័យមកកងរាជអាវុធហត្ថខេត្តបន្ទាយមានជ័យចាត់ការបន្តតាមនីតិវិធី។
លោកវរសេនីយ៍ឯក ម៉ែន ភិរម្យ មេបញ្ជាការរងកងរាជអាវុធហត្ថខេត្តបន្ទាយមានជ័យ ទទួលការងារស្រាវជ្រាវ និងបង្ក្រាបបទល្មេីសបានឱ្យដឹងថា ការបង្ក្រាបករណីខាងលើនេះ ក៏ទទួលបានការអនុញ្ញាតពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ និងមានការសម្របសម្រួលនីតិវិធីពី ឯកឧត្តម កើត វណ្ណារ៉េត ព្រះរាជអាជ្ញា អមសាលាដំបូងខេត្តផងដែរ ។
បច្ចុប្បន្ន ជនសង្ស័យត្រូវបានកម្លាំងការិយាល័យព្រហ្មទណ្ឌ កងរាជអាវុធហត្ថខេត្តបន្ទាយមានជ័យ បញ្ជូនទៅសាលាដំបូងខេត្តបន្ទាយមានជ័យហើយ នៅរសៀលថ្ងៃពុធ ទី០៩ ខែសីហា ឆ្នាំ២០២៣នេះ។ ចំណែកម៉ូតូ ត្រូវបានកម្លាំងកងរាជអាវុធហត្ថ ប្រគល់ជូនម្ចាស់ដេីមវិញហេីយ៕ 
